Kap 7: Niskopru l-valuri Lezzjoni 7.1: Nimpenjaw ruħna fil-ħajja ta’ kuljum
L-istudenti:
1. Jagħrfu xi tfisser li timpenja ruħek bis-serjetà.
2. Jifhmu permezz ta’ eżempji konkreti dan il-valur.
Year 4 Religion
Ara titlax! – 7.1
F’din il-lezzjoni ser nitgħallmu xi tfisser il-kelma ‘sfida’ jew ‘challenge’. Ser nifhmu wkoll li biex tikber bil-għaqal trid tiffaċċja l-isfidi li tiltaqa’ magħhom. Dawn l-isfidi jgħinuna biex nagħmlu mhux dak li nixtiequ imma dak li fil-mument ikun hemm bżonn. Anke Ġesù bħala bniedem kellu l-isfidi tqal tiegħu.
Sfida li ngħixu ta’ Nsara ta’ veru – 7.2
Illum ħa nitgħallmu kemm hu sew meta niffaċċjaw l-isfidi li niltaqgħu magħhom fil-ħajja tagħna. Waħda mill-isfidi kbar hija dik li nagħżlu li nkunu bil-għaqal biex nogħġbu lil Ġesù. Ser nitgħallmu wkoll dwar il-Magħmudija ta’ Ġesù u dwar il-Magħmudija tagħna.
Il-Magħmudija ta’Ġesù u l-Magħmudija tagħna – 7.3
F’din il-lezzjoni ser naraw is-simboli kollha li jintużaw fil-Magħmudija. Ser naraw ukoll l-importanza li ngħixu l-valuri ħalli ngħixu ferħanin, kemm aħna u kemm dawk ta’ madwarna.
Għandek valuri? – 7.4
Illum ser nerġgħu naraw xi tfisser il-kelma ‘valur’ u li l-valuri jgħinuna ngħixu fil-paċi mal-oħrajn. Il-valuri tal-kuraġġ u l-qawwa ħa jgħinuna nikbru bħala persuni sbieħ. Eżempji ta’ kuraġġ u qawwa huma meta nirrispettaw anke lil min mhux ħabib tagħna
Mhux kliem imma fatti – 7.5
F’din il-lezzjoni ser nitgħallmu kemm hi ħaġa sabiħa li nħobbu dejjem! Ser naraw kif Ġesù baqa’ jħobb lil Ġuda sal-aħħar u pprova jgħinu jibdel ħajtu imma Ġuda ma riedx jaf. Ser naraw ukoll x’jiġri meta persuna titkellem bla ma taħseb, kif għamel Pietru. Pietru ċaħad lil Ġesù għaliex tkellem bla ma ħaseb.
Jekk għedt is-sewwa, għalfejn issawwatni? – 7.6
F’din il-lezzjoni ser naraw l-esperjenza ta’ Ġesù qabel ma beda t-triq tal-Kalvarju. Ħa niltaqgħu ma’ żewġ personaġġi – Pilatu u Erodi. Pilatu kien il-gverntur li kkundanna lil Ġesù għall-mewt u Erodi kien re li għalkemm kien jaf li ma kienx qiegħed jgħix ħajja tajba imma kien iħobb jisma’ lil Ġesù.
Ftit baqa’ u nasal – 7.7
Illum ser naraw kif Ġesù, għalkemm kien batut u għajjien, xorta baqa’ tiela’ bis-salib. Ser naraw ukoll dawk il-persuni li ltaqgħu miegħu f’din it-triq.
Mgħallem! – 7.8
F’din il-lezzjoni ser naraw kif nistgħu nixbhu lil Ġesù li wara li bata, qam mill-mewt.
Ngħannulek għanja – 8.1
Minn din il-lezzjoni ħa tifhem li Ġesù hu r-Ragħaj it-Tajjeb tagħna. Ġesu, bħala ragħaj, jieħu ħsiebna u jara li ma jonqosna xejn. Ir-Ragħaj it-Tajjeb qatt ma jħalli mqar nagħġa waħda mitlufa, iżda jagħmel minn kollox biex isibha. Ħa titgħallem ukoll li s-Salmi huma innijiet lil Alla forma ta’ poeżija miktuba bl-għajnuna tal-Ispirtu s-Santu.
Hu għadu jmexxina – 8.2
F’din il-lezzjoni ser titgħallem min imexxi l-Knisja fid-dinja kollha u min huma dawk li jmexxu l-Knisja f’Malta. Ser tifhem ukoll li hemm xi xogħol li jagħmluh ċerti nies fil-parrocca li huma l-parroċċa: il-kappillan, il-qassisin, il-katekisti, is-sagristan, il-lajċi u l-lajċi mpenjati, il-membri tal-kor, xi sorijiet jew patrijiet fil-komunità.
Il-Knisja u l-ħajja tagħna – 8.4
F’din il-lezzjoni ser nitgħallmu d-differenza bejn il-kelma ‘Knisja’ u l-kelma ‘knisja’ u li l-Ispirtu s Santu jiġi fina fil-Magħmudija u jerġa’ jiġi fina fil-Griżma tal-Isqof. Ser nifhmu wkoll li d-dar propja ta’ Alla hija l-knisja fejn immorru nitolbu u nipparteċipaw fil-quddiesa.
X’nistgħu nagħmlu għall-Knisja? – 8.5
Hawnhekk ser nirrevedu min huma l-persuni fil-Knisja u fil-parroċċa. Ser naraw li t-talb hu l-ħin meta jien nitkellem ma’ Alla u kif dan it-talb jgħinni nirringrazzja lil Alla, nadurah, nitolbu jaħfirlu u nitolbu xi ħaġa.
X’jiswa jekk ma nħobbux? – 8.6
F’din il-lezzjoni ser naraw xi tfisser li tkun Nisrani. Li tkun Nisranit jfisser li tgħix u tħobb bħal Ġesù. Naraw kif kienu jgħixu l-Ewwel Insara.
San Stiefnu jgħallimna nħobbu – 8.7
Hawnhekk ser titgħallem dwar l-ewwel martri, San Stiefnu. U wkoll dwar kemm hu importanti li naħfru dejjem
Il-ħajja tajba tagħna – 8.8
F’din il-lezzjoni ser titgħallem dwar il-familja u dak li jagħmel familja. Ser taħseb dwar ir-responsabbiltà li hemm marbuta ma’ kull membru tal-familja.
L-imġiba tajba tiegħi – 9.1
F’din il-lezzjoni ser naraw x’inhu r-rwol tagħna fil-familja u x’għajnuna nistgħu nagħtu. Aħna nagħmlu minn familja ikbar li hi l-Knisja li hi waħda u qaddisa.
Għandi….. m’għandix – 9.2
F’din il-lezzjoni ser naraw li hemm bżonn tal-paċi fl-ambjenti differenti ta’ fejn ngħixu u nikbru. Ser naraw x’inhuma l-affarijiet li jgħinuna nżommu l-paċi u t-trankwilità u wkoll kemm hu importanti li fl-ambjenti fejn inkunu rridu naqsmu l-affarijiet ma’ xulxin u nissapportjaw lil xulxin.
Għandi….. m’għandix – 9.2
F’din il-lezzjoni int ser tifhem aktar il-bżonn tal-paċi fl-ambjenti differenti ta’ fejn ngħixu u nikbru. Ser tagħraf ukoll dawk l-affarijiet li jgħinuna nżommu l-paċi u t-trankwilità u wkoll kemm hu importanti li fl-ambjenti fejn inkunu rridu naqsmu, nissapportjaw lil xulxin.
Bħal dawk irrid inkun – 9.3
F’din il-lezzjoni ħa nitgħallmu dwar Madre Tereża. Ser naraw flimkien min kienet u x’għamlet biex tgħin lil dawk li kienu morda u foqra.
Organizazzjonijiet ta’ għajnuna – 9.4
F’din il-lezzjoni ser niftakru u nitgħallmu fuq xi organizazzjonijiet li jgħinu lil dawk fil-bżonn – bħall-Caritas, Sedqa, id-Dar tal-Providenza u l-Aġenzija Appoġġ.
M’għamel xejn b’dak li kellu – 9.6
F’din il-lezzjoni inti ser tirrevedi x’kienu l-parabboli u taqra dwar il-Parabbola tat-Talenti. Illum ser tifhem kif tista’ tqabbel din il-parabbola mal-ħajja tiegħek.
L-għemejjel tal-ħniena li jolqtlu l-gisem – 9.7
F’din il-lezzjoni ser tiftakar f’diversi modi kif wieħed jista’ jgħin lil ħaddieħor. Ser naraw ukoll l-Għemejjel tal-Ħniena li jolqtu lill-ġisem li inti tista’ tagħmel.
L-għemejjel tal-ħniena li jolqtlu r-ruħ – 9.8
F’din il-lezzjoni ser tara diversi modi oħra kif inti tista’ tgħin lil ħaddieħor fejn jidħlu l-għemejjel tal-ħniena li jolqtu r-ruħ.