Ir-riżorsi li għandek bżonn għal din il-lezzjoni flimkien ma’ riżorsi oħra provduti bħala pdfs f’din il-paġna huma:
- Printout tal-qafas tal-pożati (platt, furketta, mgħarfa, sikkina) jew platt tal-kartun
- Kuluri jew materjal ieħor tat-tpinġija
- Stampi ta’ ikel favorit tiegħek
- Imqass
- Glue stick
- Biro jew lapes
- Ibda billi tieħu l-ħin biex tara dan il-vidjo qasir bl-isem ta’: Children and The Empty Plate Test
- Ħu ftit ħin biex timmaġina lilek innifsek minflok dawk it-tfal li sabu biċċa ħobż fuq il-platt.
Kif taħseb li tħossok kieku tinduna li t-tifla jew it-tifel li hemm ħdejk m’għandhom xejn fil-platt tagħhom? - Biex tgħinek timmaġina, bl-għajnuna ta’ adult tista’ tipprintja qafas ta’ pożati (platt, furketta, sikkina, mgħarfa) mir-riżosi provduti b’forma ta’ pdf jew fuq platt tal-kartun u fuqu pinġi jew waħħal stampi tal-ikel favorit tiegħek.
- Issa, ipprova ftakar f’meta kilt l-ikel favorit tiegħek. Fuq il-qafas tal-pożati madwar il-platt jew fuq wara tal-platt tal-kartun wieġeb dawn il-mistoqsijiet:
X’togħma kellu l-ikel?
Kif ħassejtek meta rajt l-ikel favorit tiegħek fil-platt u kif ħassejtek wara li kitlu? - Sfortunatament, bħalma rajna fil-vidjo qasir fin-numru 1, ħafna tfal u anke kbar madwar id-dinja, ta’ kuljum ikollhom platti vojta tal-ikel. Ħafna nsew meta kienet l-aħħar darba jew jekk qatt kellhom dik id-darba li daqu l-ikel favorit tagħhom.
- Tista’ taħseb għala n-nies ibatu l-ġuħ u xi drabi jmutu bil-ġuħ ukoll?
Tista’ tiftakar x’għamlu t-tfal meta sabu biċċa ħobż fuq il-platt, u saru jafu li t-tifel ta’ ħdejhom kellu platt vojt? - In-nies qegħdin ibatu l-ġuħ mhux għax m’hawnx biżżejjed ikel fid-dinja għal kulħadd, imma għax uħud mill-politiċi u mexxejja ta’ kumpaniji mhumiex lesti li jaqsmu dak li għandhom ma’ dawk li m’għandhomx. Din tissejjaħ kilba ekonomika. Din il-kilba ekonomika twassal għall-inġustizzji. Probabbli, waqt li kont qed tara l-vidjo qasir, u rajt lil dak it-tifel bil-platt vojt, bdejt tgħid… Dan mhux sew! Mhux ġust! X’ħasra!
- Li tħossok iddispjaċut u li waħdek biss toqgħod tgħid li mhux ġust, mhux ser iwaqqaf lil dawn it-tfal u lill-familji tagħhom milli jbatu l-ġuħ u jmutu wkoll. Tista’ taħseb f’modi kif inti tista’ tgħin? Hawn għandek issib ftit ideat ta’ kif tista’ tgħin:-
a) Kun grat għal dak li għandek.
b) Aqsam dak li għandek fil-ħajja tiegħek ta’ kuljum mingħajr ma tistenna xejn lura.
c) Evità l-ħela u kul bil-qjies u bnin.
d) Agħti sapport lill-inizzjattivi missjunarji u programmi oħra. - Dan kollu ma jkunx biżżejjed biex jeqred in-nuqqas ta’ ikel u l-ġuħ li hawn fid-dinja. Biex din il-ħolma ssir realtà, uħud mill-politiċi u l-mexxejja tal-kumpaniji jeħtieġilhom li jbiddlu l-valuri, l-ideat u l-prioritajiet tagħhom. Biex dan iseħħ, aħna nistgħu ningħaqdu flimkien permezz tat-talb.
- Sib post komdu, agħlaq għajnejk u itlob l’Alla jiftaħ il-moħħ u jmiss il-qalb tal-mexxejja kollha tad-dinja u tal-kumpaniji biex ikunu lesti li jaqsmu r-riżorsi tagħhom mingħajr ma jistennew xejn lura. B’dan il-mod ħadd qatt ma jkollu platt vojt.
Eżempju:- Għażiż Alla, filwaqt li ngħidlek grazzi għall-ikel li għandi, nitolbok tiggwida lill-mexxejja kollha fid-dinja biex jieħdu deċiżjonijiet tajba u b’hekk kulħadd ikollu s-sehem tiegħu tal-ikel. - Issa, tista’ tpoġġi l-platt bit-tpinġija tal-ikel favorit tiegħek x’imkien fejn tiekol inti. Hekk tkun tista’ tiftakar tgħid grazzi lil Alla tal-ikel tiegħek u biex titlob għall-mexxejja tad-dinja biex ikunu lesti jaqsmu s-sehem tagħhom.
Il-vidjo bl-isem ‘Platt Vojt’ jista’ jiggwidak matul dawn il-pass filwaqt li l-vidjo link bl-isem Feeding His Family jista’ jgħinek issir konxju dwar kif jgħixu ċertu familji ta’ kuljum.